युट्युबबाट प्रसारण सुरु भयो माग्ने र तक्मेबुढाको ‘खासुखुस’ (भिडियो)

मेरी बास्सैबाट छुट्टिएपछि ‘माग्नेबुढो डटकम’ नामक युट्युब च्यानलबाट स–साना रमाइला भिडियो र जनचेतनामुलक भिडियो बनाएर मनोरञ्जन दिँदै आएका केदार घिमिरे ‘माग्नेबुढा’ र विल्सनविक्रम राई ‘तक्मेबुढा’ को ‘खासखुस’ युट्युबबाट सुरु भएको छ ।

धेरैअघि नै टेलिभिजनबाट प्रसारण गर्ने भनिएको खासखुस अहिलेसम्म कुनै टेलिभिजनमा प्रसारण भएको छैन तर, स्रोतका अनुसार छिट्टै नै कुनै राष्ट्रिय टेलिभिजनबाट ‘खासखुस’ श्रृंखलाका रुपमा प्रसारित हुने छ । त्यसो त, युट्युबमा पनि खासखुस एक भाग मात्र राखिएको छ । तर, उक्त एक भाग टेलिभिजनमै प्रसारण हुने शैलीमा बनेको छ ।

खासखुसलाई माग्नेबुढा र तक्मेबुढाले संयुक्त रुपमा निर्देशन गरेका छन् । उनीहरु आफैं पनि श्रृंखलाको मुख्य भूमिकामा छन्। कलाकारहरु भने अधिकांश मेरी बास्सैकै कलाकार देखिएका छन् । प्य्रांक भिडियोबाट चिनिएकी सवनम राई भने श्रृंखलाको नयाँ अनुहारको देखिएकी छिन् ।

टेलिभिजनमा दर्शकले हेर्दै आइरहेको शैलीभन्दा खासखुस नौलो लाग्दैन । माग्ने र तक्मेबुढा मेरी बास्सैको भन्दा फरक भूमिकामा देखिएपनि त्यति रोचक लाग्दो छैन । यसबारे निर्देशकमध्येका एक केदार घिमिरेले खासखुसको विषयमा अहिले केही पनि नबोल्ने बताए ।

स्रोत सेटोपाटी