'कबड्डी ३' नयाँ ठाउँ र परिवेशमा हुने छ : निर्देशक रामबाबु गुरुङ

अशेष अधिकारी

जीन्दगीमा जून बाटो आफ्ना लागि हुन्न त्यो बाटोमा ढुगां नभए पनि ठेस लाग्छ र जत्ति नै रोमान्चले भरिए पनि पट्यारलाग्दो हुन्छ। रामबाबु गुरूङ्का लागि पनि जीन्दगीको बाटो त्यस्तै भयो। परिबारका बाबु, बाजे, दाइ, काका, सोल्टा सबको हिँड्ने बाटो भर्ती  थियो। त्यो माहोलमा उनको इच्छा पनि फरक थिएन्।

त्यहि इच्छाका कारण उनको मन पढाइमा कम खेलकुदमा धेरै थियो। तर, खेलकुदको दौडघुपले उनलाई लाहुरे बनाउन भने सकेन्। गेटपास पाएर पोखरा त सजिलै पुग्थे तर दौडका कारण पछारिन्थे। लाहुरेमा उनी दुई पटक भिडे।

झण्डै १०-१५ वर्षपछि उनको अवस्था हेर्दा लाग्छ उनी भर्तीमा दौड्न नसक्नु कारण जीन्दगीले उनलाई दौडाउन खनेको बाटो अर्कै रहेछ। 'कबड्डी' निर्देशक रामबाबुलाई नेपाली फिल्मको हाइवेमा हाइस्पिडमा हुँइकिनु रहेछ। त्यसैले उनी लाहुरेको भर्ती दौडमा पछाडि रहे। शुक्रबारबाट उनको गत वर्षको हिट फिल्म 'कबड्डी'को दोस्रो सिक्वल 'कबड्डी कबड्डी' रिलिज भयको छ् । कमै हल पाए पनि फिल्मले पाय जती हलमा हाउसफुल व्यापार गरेको छ । तिनै रामबाबु ले आफ्नो फिल्मयात्राको 'ट्राभल डायरी' र 'कबड्डी कबड्डी'का बारेमा सुनाए।

ओखलढुंगा, रुम्जाटारमा जन्मिएका परिवारका कान्छा छोरा रामबाबु साथी सन्तोष गुरुङ्को संगतले फिल्ममा आइपुगेका हुन्। सन्तोषसँग ओखलढुंगादेखिकै चिनजान थियो। भर्तीमा जाँदा उनीहरू थप नजिक भए। पोखराबाट उनीहरू सँगै फेल भएर काठमाडौं फर्के। सन्तोष काठमाडौंमा डान्स सिक्थे। लाहुरे बन्ने बाटो बन्द भएपछि उनी पनि बिहानको समयमा कसरत हुन्छ भनेर संन्तोषसँगै नाच्न जान थाले। त्यहिबाट उनको फिल्मसँग संगत बढ्दै गयो।

'रहर त मेरो फिल्ममा आउने छँदै थिएन्। अन्त केहि 'अप्सन' नभएपछि फिल्ममा छिर्या हो। उसले पैसा हालेर केहि फिल्म पनि खेल्यो। उसँग फिल्मको सुटिङ्मा हिडिन्थ्यो। त्यस्तो ढर्रामा खुब हिँडियो।' उनले सम्झे। यसैगरी विस्तारै उनी कलाकर्मी, साहित्यकारको संगतमा पर्दै गए। उनलाई यो क्षेत्र मनपर्यो।

गत वर्ष 'कबड्डी' रिलिज भयो। फिल्मका सबै सदस्यलाई निर्माता बनाएर 'गुरिल्ला' शैलीमा निर्माण गरिएको फिल्म चल्यो। व्यवसायिक तथा समिक्षकिय पाटोबाट फिल्म राम्रो ठहरियो। गत वर्षका अवार्डहरुमा उनको फिल्मले निर्देशन, लेखन विधामा धेरै अवार्डहरु पनि हात पार्यो। अघिल्लो फिल्म 'अनागरिक' गर्तमा हराएको अनुभव संगालेका रामबाबुले राष्ट्रिय पुरस्कार लगायतका अवार्डहरु जित्न सफल रहे। दर्शकका नजरमा उनले राम्रो फिल्म बनाउने निर्देशकको छाप छोडे।

त्यसैबाट हौसिएका उनी फिल्मको सिक्वलसहित तयार भइसकेका छन्।

'कबड्डी फिल्म आफैमा परिक्षण थियो। दर्शकले कसरी लिन्छन् भन्ने मनमा थियो। फिल्म मनपराउँछन भन्ने आश पनि थियो। त्यसैले फिल्मको अन्त्य 'ओपन एन्ड' सहित टुङ्ग्याइयो।'

फिल्मको सिक्वललाई लिएर उनी अलि अलि 'नर्भस' पनि छन्।

'पहिलो फिल्मका कारण दर्शकमा आशा पहिलो भन्दा बढेको छ। उनीहरुमा फिल्म राम्रो बनेको छ भन्ने धारणा स्थापित भएको छ। त्यसैले त्यसलाई सम्बोधन गर्न सक्छु कि सक्दिन भन्ने त मनमा छँदैछ। त्यसो हुँदा मनमा केहि मात्रामा डर छ तर, दर्शकलाई निराश पार्ने काम गरेको छैन् भन्ने विश्वास छ।'

पहिलो र दोस्रो फिल्मका आधारभूत संरचनामा खास ठुलो परिवर्तन नगरेको उनले बताए। 'पहिले जे हो अहिले पनि त्यहि छ। फरक भने फिल्मको व्याकड्रपमा हो। पात्रहरुको कथा त्यसैको सेरोफेरोमा घुमेको छ। पहिलो फिल्ममा काजीको प्रेममा बाहिरिया मान्छे 'भिजिलान्ते' थियो। यसमा 'भिजिलान्ते' घरभित्रैबाट रहेको छ।'

घरभित्रैबाट निस्केको 'भिजिलान्ते' र काजीको दन्वदमा उनिएको कथाले दर्शकलाई मनोरञ्जन दिने उनले प्रयास गरेका छन्। पहिलो निश्चललाई भिजिलान्ते बनाइएको थियो। दोस्रोमा फेरि उसैलाई लान नसकिने भएकाले यसपटक सौगातलाई भिजिलान्ते बनाएर छिराइएको छ।

'पहिलो फिल्मका कारण दर्शकहरुको पात्रसँग एक खालको निकटता भइसकेको छ। पात्रहरुलाई दर्शकले माया गरेका छन्। त्यसैले दोस्रो भागलाई पनि दर्शकको साथ रहन्छ भन्ने मैले सोचेको छु।'

पहिलोबाट दोस्रो भागसम्म आइपुग्दा उनले फिल्मका कलाकारहरु 'अपग्रेड' भएको अनुभव छ। उनले विजय बरालको नाम लिए। सबै पात्रहरुमा सबै कलाकारको अभिनय राम्रो छ। विजयले भने फिल्ममा पहिलोमा भन्दा आफूलाई अझ माझेका छन्। दयाको र अरु आफ्नो लयमा जमेका छन्।'

त्यस्तै उनले फिल्मको तेस्रो सिक्वलको सम्भावना कायम रहेको स्पष्ट पारे।

'पहिलो फिल्ममा पनि मैले अघि भने जस्तै 'ओपन एन्ड'मा लगेर फिल्म सिध्याएको थिएँ। त्यतिबेला दर्शकले रूचाएको खण्डमा फिल्मको कथा अर्को भागमा पनि लान्छु भन्ने सोच थियो। यसलाई पनि दर्शकले रूचाए भने म तेस्रो श्रृखंला पनि बनाउँछु। तेस्रो मात्र हैन दर्शकले जबसम्म यसलाई चाहिरहन्छ त्यो समयसम्म यसलाई बनाउँने छु, तर दर्शकले 'भयो' भन्ने भयो भने बनाउँदिन्।'

उनले तेस्रो फिल्ममा भने नौरी गाँउ नहुने पनि खुलासा गरे। तेस्रो सिक्वलमा नयाँ ठाँउ र परिवेशमा हुनेछ।

'पहिलो फिल्म बनाउँदा पनि दर्शकले रुचाए भने दोस्रो बनाउने भनेर कथा त्यहि अनुसार ओपन एन्डमा छोडिएको हो। दोस्रोमा पनि त्यस्तै गरिएको छ। फिल्म राम्रो भो र मनपराइयो भने डेढ दुई वर्षपछि तेस्रो पनि बनाउने योजना छ।'

उनी नयाँ फिल्मको तयारीमा पनि जुटिसकेका छन्। उक्त फिल्म जनराका हिसाबले 'कबड्डी' भन्दा फरक हुनेछ। फिल्ममा उनले दुई दाजुभाइको कथा भन्नेछन्। एकसरो स्क्रिप्ट तयार भइसकेको छ। फिल्ममा केहि कलाकार पनि छनोट भइसकेको उनले बताए।

उनले फिल्मका योजना सुनाउँदै जादाँ आजसम्म बनाएका र पाइपलाइनमा भएका फिल्म भन्दा अन्य सिरियस विषयमा फिल्म बनाउने उनको धोको अझै बाँकी छ। उनको खास लगाव पनि त्यस्तै फिल्ममा हो। 'अहिले बनाइरहेको जस्तो फिल्म भन्दा पनि फरक फिल्ममा मेरो रूचि हो।' उनी केहि वर्ष पछि त्यसलाई मूर्तरुप दिने मुडमा छन्।

स्रोत SetoPati