टिकट ब्ल्याक गर्नेसँग विश्वज्योतीमा फाइट पर्‌‍यो : एसएसपी सर्वेन्द्र खनाल

-अशेष अधिकारी 
-सिनेमा-संवाद

पहिलो पटक हेरेको फिल्मको बारेमा सोध्दा महानगरिय प्रहरी अपराध महाशाखाका प्रहरी वरिष्ठ उपरिक्षक (एसएसपी) सर्वेन्द्र खनालले 'यस्तो कुरा मलाई यादै हुँदैन्' भने। 'सम्झनुस् न' भने पछि उनले आफ्ना एक साथीलाई फोन घुमाए र सोधे, ' हामी पहिलो पटक हेर्न गएको फिल्म कुन हो?' साथीले उताबाट के जवाफ दिए। उनले जवाफ फर्काए 'त्यो त धेरै पछि हो।' केहिबेर छलफल चल्यो र फिल्मको नाम फाइनल भयो: राजकुमारको हिन्दी फिल्म बुलन्दी; साल २०३६ र हल जय नेपाल।
उनले फेरि भने 'यस्तो चिज जत्ति गरे' पनि याद हुन्न्। महानगरिय प्रहरी अपराध महाशाखा आएपछि उनले गरेका विभिन्न कामले उनी समाज र संचारमा कुनै फिल्मी 'हिरो' भन्दा कम दरिएका छैनन्। उनी 'रिल'को हैन 'रियल' हिरो बनेका छन्। उनै 'रियल' हिरो एसएसपीसँग गरिएको सिनेमा-संवाद यस्तो थियो:

तपाईँले पहिलो पटक हेरेको फिल्म कुन हो?
राजकुमारको बुलन्दी, २०३६ सालमा, जय नेपाल हलमा। नेपालीचाँहि 'माइतीघर' हो जस्तो लाग्छ।

फिल्म किन हेर्नुपर्छ? तपाईँका लागि फिल्म के हो?
मनोरञ्जन र शिक्षाका लागि। मेरा लागि फिल्म समय मिल्दा मन बहलाउने साधन र साथीभाइसँग भेटघाट गर्ने अवसर जस्तो हो।

 कस्तो फिल्म मनपर्छ?
 एक्सन फिल्म। मलाई पनि वास्तविक जीवनमा पनि 'एक्सन' मनपर्छ।

कुन माध्यममा फिल्म हेर्न रुचाउनु हुन्छ?
 पहिला पहिला काठमाडौंका भिडियो पार्लरमा हेरियो। मलाई मिलेसम्म फिल्म हलमा नै हेर्न मनपर्छ। त्यसैले हलमा नै हेर्ने प्रयास रहन्छ।

फिल्म कसरी छान्नुहुन्छ?
 अरूको सिफारिसमा। उनीहरुले तिमिलाई यो मनपर्छ भनेर सिफारिस गरेपछि ती फिल्म हेर्ने गर्याछु।

आदर्श नायक नि?
अभिताभले अभिनय गरेका 'एग्री योङ्म्यान'का प्राय सबै चरित्रहरु। विशेष सम्झनुपर्दा 'दिवार' फिल्मको चरित्र।

तपाईंका लागि आदर्श खलपात्र को हो?
अमरिश पुरिले निभाएका खलचरित्रहरु। उदाहरणका लागि मिस्टर इन्डियाको 'मुग्याम्बो'।

धेरैपटक हेरेको फिल्म?
अमिताभ र धर्मेन्द्रको 'शोले' हो। त्यो फिल्म ३ पटक हेरे मलाई त्यो फिल्म दमदार लाग्छ।

आज कतिवटा फिल्म हेर्नुभयो?
दुई-तीन सय पुगेकी। ठ्याक्कै थाहा छैन्।

कुन समयमा धेरै फिल्म हेर्नुभयो?
 स्कुले जीवन र एसएलसीको बिदाको समयमा धेरै हेरियो।

मन पर्ने निर्देशक जसको तपाईं डाइहार्ट हुनुहुन्छ?
 त्यस्तो कोहि पनि छैन्।

नेपाली फिल्म कत्तिको हेर्नु हुन्छ?
 समय र मौका मिल्दा।

फिल्म हेर्दाका कुनै रोचक घटना छन्?
स्कूल पढ्दा विश्वज्योतीमा टिकट ब्ल्याक गर्ने केटाहरुसँग लाइनलाई लिएर विवाद पर्यो र झगडा भयो। साथीहरुसँग मिलेर पिटियो। त्यो घटनापछि धेरै समय विश्वज्योतीमा फिल्म हेर्न गइएन। हामी अमिताभ र रेखाको 'सिलसिला' हेर्न गएका थियौं।

पछिल्लो पटक कुन फिल्म हेर्नुभयो?
हिन्दीमा आमिरको 'पिके' हो। प्रिमियरमा नेपालीमा 'चंखे शंखे पंखे' हेर्न गएको मनमपरेन आधिमा नै निस्के।

मनपर्ने हिरोइन?
स्मिता पाटिल।

जीन्दगीमा हिरो भन्ने लहड चलेन?
अँह कहिल्यै लागेन।

स्रोत सेतीपाटी