आधा पेजमा केटाको पछि लागीन रिस्ता

फिल्म आधा पेजमा रिस्तालाई केटा क्रेजी युवतीको भूमिकामा देख्न पाइने भएको छ । बिहीबार राजधानीमा सार्वजनिक फिल्मको ट्रेलरमा रिस्ताको यस्तो स्वरुप देखाईएको हो । सोही अवसरमा फिल्मको रिलिज मिति पनि सार्वजनिक गरियो । फिल्म पौष १० गतेबाट देशभरका करिब ६० वटा हलमा लाग्ने भएको छ ।

फिल्मको बारेमा जानकारी दिन आयोजना गरिएको पत्रकार सम्मेलनमा निर्माता लिलाबहादुर न्यौपानेले प्रदर्शन मितिको बारेमा बताएका हुन् । त्रिकोणात्मक प्रेम कथामा आधारित यो फिल्मका निर्देशक समुन्द्र भट्ट हुन् । तर, फिल्मलाई निर्देशक शोभित बस्नेतले पुरा गरेका थिए । निर्देशक भट्ट विदेश हानिएपछि शोभितले फिल्म पुरा गरेका हुन् । सलोन बस्नेत, रिस्ता बस्नेत, रुपेश न्यौपाने, विपना बस्नेत, दीपक क्षेत्रपाठी फिल्मका मुख्य कलाकार हुन् ।

लीलाबहादुर न्यौपाने र ज्ञान बहादुर न्यौपाने निर्माता रहेको फिल्मका प्रस्तुतकर्ता भने रुपक न्यौपाने हुन् । कार्यक्रममा फिल्मका मुख्य कलाकार सलोन बस्नेतले आधा पेज राम्रो बनेको बताए । उनले त्रिकोणात्मक प्रेम कथामा बनेको यो फिल्ममा आफू चुलबुले यूवकको भुमिकामा देखिएको पनि स्पष्ट पारे । अभिनेत्री रिस्ता बस्नेतले फिल्ममा काम गर्दा रमाइलो भएको अनुभव सुनाइन् ।

नयाँ अनुहार रुपेश न्यौपानेले फिल्मको कथावस्तु राम्रो भएको र पहिलो पटक काम गर्दा आफूलाई विश्वास अझ बढेको बताए । आकाश बुढाथोकीको कथा रहेको फिल्ममा मरण गायक र रुपक न्यौपानेको शब्द तथा संगीत छ । फिल्ममा इन्द्रलाल श्रेष्ठको छायांकन, सन्तोष ढकालको सम्पादन, रामजी लामिछानेको नृत्य निर्देशन छ । (स्रोत फिल्मी खबर)