‘आधा पेज’मा रिस्ता र सलोनको यस्तो संवाद

पौष १० गतेबाट प्रदर्शनमा आउन लागेको चलचित्र ‘आधा पेज’को ट्रेलर र गीत सार्वजनिक गरिएको छ । काठमाण्डौमा पत्रकार सम्मेलनको आयोजना गर्दै समुन्द्र भट्टले निर्देशन गरेको यो चलचित्रको पहिलो मुहार देखाइएको हो ।

त्रिकोणात्मक प्रेमकथामा आधारित यो चलचित्रमा सलोन बस्नेत, रिस्ता बस्नेत र रुपेश न्यौपानेको मुख्य भूमिका छ । चलचित्र पत्रकार संघका अध्यक्ष शान्तिप्रिय प्रमुख अतिथी रहेको कार्यक्रममा प्राविधिक कारणले गीत र ट्रेलर देखाउन भने सकिएन । चलचित्रका मुख्य कलाकारले ‘आधा पेज’बाट धेरै नै आशावादी बनेको बताए । नायक सलोन बस्नेतले आफूले यस अगाडि गरेका चलचित्र भन्दा यो चलचित्र फरक भएको बताए । चलचित्रमा विपना बस्नेत, दीपक क्षेत्री, सुरज आरडी, सन्तोष ढकाल लगायतका कलाकारको पनि अभिनय छ

 ।

परी फिल्मस्को ब्यानरमा तयार भएको यो चलचित्रलाई लीलाबहादुर न्यौपाने र ज्ञानबहादुर न्यौपानेले निर्माण गरेका हुन् । चलचित्रमा रामजी लामिछानेको नृत्य निर्देशन, इन्द्रलाल श्रेष्ठको छायांकन, आकाश बुढाथोकीको कथा, सन्तोष ढकालको सम्पादन छ ।

चलचित्रको सार्वजनिक ट्रेलरमा केही युवालाई केन्द्रित संवाद र त्रिकोणात्मक प्रेम कथालाई देखाइएको छ ।