कलाकार हरु नयाँ शक्तीको पोस्टर बन्न सक्ने पीर

डा. बाबुराम भट्टराई संयोजक रहेका 'नयाँ शक्ति' को घोषणामा उनीबाहेक अरू को को छन्? कतिका नाम मान्छेको दिमागमा आउँछन्? अरूको आए पनि/नआए पनि करिश्मा मानन्धर र सरोज खनालको नाम होइन, तस्बिरै दिमागमा नाच्छ होला।

किनभने, उनीहरू गिनेचुनेका फिल्मकर्मी हुन्। यसको मतलब हो, नयाँ पार्टीको प्रचारमा उनीहरू राम्रै काम आए। यी दुई वरिष्ठ फिल्मकर्मीसँगै अशोक शर्माको राजनीति प्रवेशले तरंग पनि सिर्जना गरेको छ। सबैभन्दा ठूलो तरंग फिल्म क्षेत्रमै छ। तर, फिल्म क्षेत्रमा खुशी कम संकोच बढी छ। धेरैको पीर छ– फिल्ममा जस्तै यी कलाकार पोस्टरमा मात्रै हुन् कि? किनभने, फिल्म क्षेत्रमा चलनै छ, गिनेचुनेका कलाकार फिल्ममा अतिथि भूमिकामा किन नहुन्, पोस्टरमा अनुहार राखिन्छ नै। जसले गर्दा दर्शक हलसम्म पुगून्। त्यसैले संकोच छ, यहाँ पनि यी कलाकारको भूमिका 'कार्यकर्ता' पार्टीसम्म मात्रै पुर्याचउने त होइन?

यी संकोचका पछाडि केही ताजा घटना छन्। अघिल्लो चुनावमा अभिनेत्री रेखा थापा र अभिनेता भुवन केसीको तस्बिर राजनीतिक दलले प्रचारको 'पोस्टर'मा मात्रै टाँसे। पछि चुनावमा दुइटैको भूमिका फिल्ममा जस्तै अतिथिमात्रै देखियो! रेखाले प्रत्यक्ष निर्वाचनमै टिकट पाउने बताइयो। उनले प्रचार पनि गरिन्। पछि 'प्राविधिक पर्योन' भनियो। रेखा अलपत्र परिन् र केही महिनामै उनले टिकट नदिने पार्टी एमाओवादी परित्यागै गरेको घोषणा गरिन्। यसैले बुझाउँथ्यो, कारण प्राविधिक थिएन। फिल्म क्षेत्रले नै बाठी भनेर स्विकारेको रेखालाई यिनै नयाँ शक्तिका अध्यक्ष रहेका डा. भट्टराई भएकै पार्टीले 'नचाएको' थियो। उता समानुपातिकमा रहेका अभिनेता केसी एमालेको चुनावमा भोट माग्न पूर्वपश्चिम गरे। तर, सांसद् हुने उनको चाहना चाहनैमा सीमित भइदियो।

संकोचहरू प्रकट भइररहेका छन्, यसपल्ट परेको बेला उपयोग गर्ने राजनीतिज्ञको रणनीतिमा करिश्मा र सरोज खनाल फसेका त होइनन्? कतै नयाँ राजनीतिक पार्टीको 'प्रचार सामग्री' मात्रै बन्ने त होइनन् उनीहरू?

 स्रोतNagariknews